Asosiasaun Defisiensia Timor-Leste (ADTL) realiza semináriu nasional kona-ba valoriza Direitu ba Ema ho Defisiensia liu husi aloka rekursu hodi implementa Planu Asaun Nasional Defisiensia 2021-2030.

Iha seminariu nasional ne'e mos lansa vidio asesibilidade no ranpa iha setor transporte rodaviariu.

Iha diskursu, Vice-Primeiro Ministro, Ministro Coodernador dos Assuntos Sociais, Ministro do Desenvolvimento Rural e Habitação Comunitária, Eng. Mariano ASSANAMI Sabino, hatete, Timor-Leste hahú nía luta ba ukun rasik-an hodi hari'i Estadu Direitu Demokratiku ne'ebe konta ho partisipasaun Timor-oan hotu ni'an, hahú husi labarik, ferik no katuas ho tempu ne'ebé naruk tebes to'o alkansa independensia, hot- hotu iha memória ba Luta ni'an no ema ida-idak iha nia istoria rasik.

Ho nune'e mak bainhira restaura independensia Konstituisaun Republika fo importansia no rekoñese ema hotu nia partisipasaun hodi la diskrimina no fokus espesialmente mos ba maluk defisientes sira hodi garante tratamentu hanesan ho ema seluk.

Timor- Leste nudar País soberanu ne'ebe adere mos ba Konvensaun ONU ba EhD, iha Programa IX Governu fo importansia makás ba sidadaun vulnerável sira no EhD atu goza direitu ne'ebe mak hanesan ho sidadaun seluk.

Alende ne'e, IX Governu kria mos medidas apoiu balun mak hanesan atu estimula kriasaun negosius auto-sustentavel ba sidadaun ho defisiensia. Atu garante asesu ba infraestruturas publikas, atu nune'e fasilita partisipasaun EhD no programas hotu ne'ebe mak Ministeriu relevantes sira trasa no kontempla iha Planu Asaun Nasional, integradu no fo mos konsiderasaun hodi envolve Timor-Oan hotu, nudar autor no benefisiariu iha prosesu dezenvolvimentu nasional.

"Liu husi seminariu nasional ne'e, hakarak konvida ita hotu, atu haree kle'an no deklara katak, iha ita nia let ka iha ita nia sosiedade, laiha Grupu Invalidez. Ema hotu válidu nudar sidadaun no prontu atu partisipa no kontribui," dehan V-PM, iha Salaun MTK, Kaikoli.

Vise-Primeiru Ministru subliña liutan, defisiensia la'os fator ida atu justifika katak, ema ida laiha kbiit ka labele ona atu halo buat ida, tanba kbiit, potensial no talentu ema ida idak nian la hanesan.

Espera katak, liu hosi Seminariu Nasional ida ne'e, bele halibur ideias hamutuk, fahe hanoin ba malu, atu nune'e bele servi diak liu tan povu no nasaun.