Vice-Primeiro Ministro, Ministro Coodernador dos Assuntos Sociais, Ministro do Desenvolvimento Rural e Habitação Comunitária, Eng. Mariano ASSANAMI Sabino, konsidera Fakuldade de Turismo, Artes, Industrias Creativas e Culturais (FTAICC) husi Universidade Nasional Timor Lorosa'e (UNTL), importante tebes ba Dezenvolvimentu ekonomia Timor-Leste iha futuru.

Vise-Primeiru Ministru hatete, lia hirak ne'e iha serimonia Primeiru Judisium Kursu Lisensiatura Comersiu no Turizmu, iha Tinan Akademiku 2024-2025. ho tema "Kreativu, Inovativu, Adaptasaun, Progresu, no Dalan Ba Dezenvolvimentu Turizmu Sustentavel".

Iha diskursu Vise-Primeiru Ministru, hatete, turizmu nudar komponente importante ne'ebe hatur ona iha Planu Estratejiku Dezenvolvimentu Nasional (PEDN), ne'ebe tama iha pilar tolu importante, Dezenvolvimentu Perolifera Pilar dahuluk, Pilar Daruak mak Agrikultira no Pilar Datoluk mak Turizmu, tanba ne'e pilar ekonomia produtivu ne'ebe prioridade ba Timor-Leste.

"Ita hotu hatene katak agora dadaun lidera hela ita nia ekonomia mak petroleum no minerais, husi fundu ida ne'e mak ohin loron sustenta hela ita nia dezenvolvimentu to'o ohin loron," dehan V-PM, iha Palasiu Governu.

Timor-Leste nudar nasaun foun ne'ebe estratejiku no iha potensialidade turizmu ne'ebe boot tebes hanesan turizmu hitoriku, kultural, relijiozu no turizmu ekoloziku hanesan foho no tasi ho paisazen ne'ebe furak bele atrai vizitante sira nune'e fo redimentu ba estadu.

Atu atrai turista sira mak presiza service ka atendimentu ne'ebe diak, situasaun hakmatek, infraestrutura ne'ebe sustentavel, estrada diak, internet diak, preparasaun kulinaria ne'ebe diak, uma ba ema toba mos tenke seguru.

Atu garantia kestaun ne'e hotu la'o diak mak governu hahu ho politika prepara infraestrutura bazika sira hahu husi dezenvolve estrada nasional ba munisipiu, dezenvolve portu no aeroportu sira ho objetivu atu fasilita prosesu sira ne'e hotu iha futuru.

"Ba ha'u nia alin sira hotu ne'ebe ohin tuir judisium imi hotu mak rekursu importante atu garantia dezenvolvimentu ekonomia produtiva hanesan turizmu, husu imi atu sai joven ne'ebe kreativu, inovativu, hodi kontribui ba dezenvolvimentu nasional," dehan V-PM.

Nudar Vice-Primeiro Ministro, Ministro Coodernador dos Assuntos Sociais, apresia ba estudante hotu ne'ebe esforsu an ohin tona iha faze ida ne'e, siensia ne'ebe simu presiza dezenvolve diak liutan, tulun an rasik no tulun ema seluk tanba imi mak sai ajente prinsipal ba dezenvolvimentu.

Estudante finalista sira ne'ebe partisipa iha Judisium tinan akademiku 2024-2025 hamutuk 43, tuir planu sira sei simu graduasaun iha fula-jullu, tinan ne'e.